Cwrs Undydd: Ffotograffiaeth a Llenyddiaeth

Oes yna berthynas rhwng ffotograffiaeth a llenyddiaeth? Sut mae ymateb drwy dynnu llun i le yn gallu dylanwadu ar ein hymateb llenyddol? Oes modd inni greu llenyddiaeth sy’n sefyll ar ei phen ei hun ac eto’n gallu bod yn gysylltiedig â ffotograff o le neu beth neu berson?

Dyma gyfle i arbrofi gyda ffurf a gweld sut mae tynnu lluniau, boed efo camera ar eich ffôn, camera polaroid, neu gamera ‘proffesiynol’, yn gallu ysbrydoli darn o lenyddiaeth. Mae’r berthynas rhwng gair a golygfa sy’n cael ei dal mewn llun yn un hynod, ac fel rhan o’r cwrs, bydd cyfle ichi grwydro i’r lluniau a dynnir gennych chi a gan eraill a gweld beth sy’n codi ohonyn nhw, yn gerddi, yn llên feicro, yn stori fer, yn nofel, neu’n ddarn o lenyddiaeth heb unrhyw label gonfensiynol.

Does dim rhaid ichi fod yn ffotograffydd o fri o gwbl i fynychu’r cwrs yma – dim ond ag awydd rhoi cynnig ar drywydd penodol, ac efallai un gwahanol i’r hyn rydych yn arfer ei ddilyn, i greu gwaith newydd. Dewch yn llu i weld beth fydd yn codi o’ch lluniau yn Llanystumdwy a thu hwnt!

Bydd te, coffi a melysion ar gael drwy’r dydd, a gweinir cinio ysgafn i bawb fel rhan o bris y cwrs. Os yn teithio o bell, neu awydd aros dros nos, holwch ni am bris llety neu cymrwch gip ar ein Bwthyn Encil Awduron, Nant.