Mae sawl aelod o staff Llenyddiaeth Cymru yn gweithio o’n swyddfa yn Nhŷ Newydd. Fe ddewch ar ein traws gan amlaf yn y gegin, wrth i ni ferwi’r tegell i wneud ein coffi beunyddiol (a dwyn bisged neu ddwy).
Yn gyfrifol am agweddau Tŷ Newydd yn benodol mae:
Miriam Williams
(Hi/Hon)
Fe ymunodd Miriam Williams â’r tîm yn 2016 a hi yw Rheolwr Tŷ Newydd – yn gyfrifol am drefnu amryw o elfennau eich arhosiad yn Nhŷ Newydd gan gynnwys bod yn bwynt cyswllt i diwtoriaid a darllenwyr gwadd, hwyluso archebion a threfnu gyda gwesteion, cydlynnu agweddau iechyd a diogelwch y ganolfan a’r safle a llu o gyfrifoldebau gweithredol eraill.
Miriam Sautin
(Hi/Hon)
Rheolwr Creadigol yw Miriam Sautin, a hi sy’n gyfrifol am guradu rhaglen gyrsiau ac encilion Tŷ Newydd. Mae Miriam hefyd yn rheoli rhai o brosiectau datblygu awduron amlycaf Llenyddiaeth Cymru, gan gynnwys rhaglen Cynrychioli Cymru. Ymunodd Miriam â’r tîm yn 2021 ac y mae hi wedi arwain ar rai o’n prosiectau mwyaf cyffrous gan gynnwys Children’s Laureate Wales.
Lora Juckes-Hughes
(Hi/Hon)
Ymunodd Lora â’n tîm yn 2022, a hi yw ein Cydlynydd Gweithrediadau. Mae Lora yn sicrhau bod y ganolfan yn rhedeg yn effeithiol ac yn gofalu am ein gwesteion, yn ogystal â gweinyddu un o’n rhaglenni nawdd, Cronfa Ysbrydoli Cymunedau. Yn eu hamser sbâr, mae Lora yn mwynhau crosio, darllen a phaentio.
Tony Cannon
(Fo/Hwn)
Tony yw ein Cydlynydd Arlwyo a Lletygarwch ac ef sy’n gyfrifol am fwydo bwyd blasus cartref i’n gwesteion. Yn gogydd profiadol ers dros 40 mlynedd, gall Tony ddarparu ar gyfer llu o anghenion diet gwahanol, ac mae ei fara di-glwten cartref a’i fisgedi Anzac yn enwog drwy Gymru a thu hwnt. Mae Tony wedi bod yn coginio bwydydd blasus a phobi cacennau lu yma yn y ganolfan ers 2015.
Melanie Watson
(Hi/Hon)
Mel yw ein Cydlynydd Lletygarwch a hi sy’n gyfrifol am sicrhau fod ein safle yn cael ei gadw i’r safon gorau posib a bod arhosiad ein gwesteion yn gyfforddus. Yn ystod eich arhosiad, mae’n siŵr y byddwch yn cwrdd â Mel wrth i chi gyrraedd, ac fe fyddwch yn sylwi ar ei gwaith a’i llygad craff wrth fynd o gwmpas yr adeilad, er na fyddwch chi’n ei gweld hi wyneb yn wyneb o bosib. Mae croeso i westeion sgwrsio â Mel (a gweddill y tîm) a rhoi gwybod i ni am unrhyw beth allwn ni ei wneud i wneud eich arhosiad yn fwy cyfforddus.
Gallwch ddysgu rhagor am weddill tîm Llenyddiaeth Cymru, trwy glicio yma.
